كچێكی نەونەمام و كەم ئەزموون
(شەیما) قوتابی بوو لە كۆلیژی ئەندازە و خۆی خەڵكی شاری (موسڵ) بوو، بەڵام ناوی لە زانكۆی ئەم شارە دەرنەچوو بوو، ئەگەرچی سەرەتا خێزانەكەی رازی نەبوو بوون كە كچە جاحێڵەكەیان بەتەنیا بۆ خوێندن بچێتە شارێكی تر، با كۆلێژەكەش كۆلیژێكی باش بێت، بەڵام ئەوەی وایكرد كە خێزانەكەیان رازی بن، ئەو كچە هاوڕێیەی (شەیما) بوو كە ناوی (نادیە) بوو و دراوسێی ماڵیان بوون. ئەوان هەردووكیان وا رێكەوت كە ناویان لە كۆلیژی ئەندازیاری دەربچێت، بەڵام هەریەكە و لە بەشێكی جیاواز، بە هەوڵی هەردوولا و ماڵی (نادیە) توانیان دایك و باوكی (شەیما) رازی بكەن كەوا رێگە بدەن كچەكەیان لە زانكۆیەكی دەرەوەی شارەكەیان بخوێنێ، (شەیما) ئەو رۆژەی كە ماڵەوەیان رازی بوون لەسەر بەردەوامبوونی لەسەر خوێندنەكەی، جەژنی بوو، خەریك بوو لە خۆشیان شێت دەبوو، دەیان خەونی سەوزی بە كۆلیژ و ناسینی كوڕێكی كۆلیژی ئەندازیاری كە بەیانی دوای تەواوكردنی كۆلێژ هەردووكیان وەك ئەندازیار دەردەچن و پێكەوەنانی خێزان و. دەیان و دەیان خەون و خەیاڵی خۆشتری تر. هەركە ناویان دەرچوو، دایك و باوكی رازی بوون، خۆی و (نادیە) جانتا و جل و بەرگ و پێداویستییەكانی سەفەر و نیشتەجێبوون لە شارێكی تر، دوور لە كەس و كار و هەندێ شتی تریان، ئامادە كرد و بەرەو زانكۆكە بەڕێ كەوتن، دوای هەفتەیەك دەستیان بە دەوامی ئاسایی كرد و لەبەشە ناخۆیی كچان شوێنێكیان بۆ مەیسەر كرا، لە ساڵی یەكەمی خوێندنیدا هیچ كێشەیەكی وای بۆ نەهاتە پێش، بەسەركەوتوویی ئەو قۆناغەی بڕی، بەڵام لە ساڵی دووەمدا، كە خۆی بووە قوتابی قۆناغی دووەم، كوڕێكی ناسی كە ئەویش خەڵكی شارێك لە شارەكانی باشووری عێراق بوو، كوڕە وای نیشاندەدا كە بۆی سووتاوە، یەكترناسینەكەشیان لە ئاهەنگی یەكتر ناسین بوو. بەهەرحاڵ كاتێك هەردوولا بۆ پشوو دەچوونە كافتریاكە، كوڕەكە كە ناوی (عەلی) بوو بە هەرچۆنێك بایە دەرفەتێك یا رێكەوتێكی دەدۆزیەوە و خۆی دەگەیاندە مێزەكەی (شەیما و نادیە)، بەمجۆرە ئەو هەوڵانەی (عەلی) بەردەوام بوو، تا توانی پەیوەندییەكی هاوڕێیەتی بەهێز و دواتر خۆشەویستییەكی بەهێزتر لە نێوان خۆی و (شەیما) دروست بكات.
ئەم پەیوەندییە رۆژ بە رۆژ و مانگ بە مانگ بەهێزتر دەبوو، تا وایلێهات دەبوو هەموو رۆژێ پێكەوە بن و گەڕان و پیاسەی خۆیان بكەن، تا گەیشتنە قۆناغی دواتر، واتە كە (شەیما) چووە قۆناغی سێیەم، لە سەرەتای دەستپێكردنی ئەم قۆناغەوە (نادیە)ی هاوڕێی چەند جارێك هۆشداری دایە (شەیما) كە ئەوەندە لەگەڵی دەرنەچێ و تا درەنگ لەگەڵی نەمێنێتەوە. (شەیما) سات بە سات دەرچوون و پیاسەكانی خۆی لەگەڵ (عەلی) بۆ (نادیە) باس دەكرد، ئەویش هەمیشە و بە بەردەوامی رەخنەی لێدەگرت كە هێشتوویەتی (عەلی) ئەوەندە لێی نزیك بێتەوە. (شەیما) هەموو جارێ دەیگوت: كچێ نازانم تۆ بۆ ئەوەندە لە كوڕان بە گومانی و لە هیچ و خۆڕایی لە كوڕ دەترسێیت، ئەو سەد جار سوێندی خواردووە و بەڵێنی داومەتێ كە دێتە داخوازیم، من بەتەواوەتی بڕوای پێدەكەم و متمانەم پێی هەیە. بڕوام پێی هەیە چونكە لە خێزانێكی دەوڵەمەند و تا ئێستاش چیم ویستوە و چیم لێداوا كردووە، بێ پرسیاركردن بۆی هێناوم، زۆر جار شتی وای پێداوم ئەسڵەن هەر لە خەیاڵیشم نەبووە و داواشم نەكردووە.
شەوە سەوزەكە
كاتژمێر دەوروبەری (5/10) ی بەیانی بوو، كە (شەیما) بەهاوڕێیەتی (نادیە)ی دەستەخوشكی چوونە ئەو بنكە پۆلیسیەی كە لە نزیك بەشە ناوخۆیەكەیان بوو، بە پرسیاركردن چوونە ژووری ئەفسەری بنكەكە و خۆیان پێناساند، دوای كەمێك ئەفسەرەكە لێی پرسی كە بۆچی هاتووە و چی دەوێ و وتی: فەرموو خێرە هاتوویتە ئێرە، كێشەیەكت هەیە؟ ئەوەی بە زمانی عەرەبی پێی گوت. (شەیما) دەستی بە گریان كرد و نەیتوانی قسە بكات، لە جیاتی ئەو (نادیە)ی دەستەخوشكی قسەی كرد و گوتی: یەك دوو ساڵێكە ئەم دەستەخوشكەم پەیوەندییەكی خۆشەوستی لەگەڵ كوڕێك هەیە، كوڕە زۆر بەڵێنی سەوز و سووری پێداوەو ئەمیش لەگەڵی بووە، تا پەیوەندییەكیان زۆر بەهێز بوو، ئیتر چەندین جار بەیەكەوە پیاسەیان كردووە و بەتەنیا دانیشتوونە و هیچ كێشەیەك رووینەداوە. تا ئەو رۆژەی كوڕە گورزەكەی خۆی وەشاند. لێرەوە (نادیە) وەستاو داوای لە ئەفسەرەكە كرد كە هانی (شەیما) خۆی بدات كە بەخۆی كێشەكەی بگێڕێتەوە و باس بكات، ئەوەبوو ئەفسەرەكەش پێی گوت: ئەم دەستە خوشكەت دەبێتە شاهید و تۆش وەك دادخواز سكاڵات بۆ تۆمار دەكەم و دۆسیە بۆ كێشەكەت دەكەمەوە و وا دەكەین كە كوڕە دەستگیر بكەین. بەمجۆرە (شەیما) لەسەرێكەوە سوور هەڵگەڕابوو لە شەرمان، لەسەرێكی تر لەبەر هەنسكی گریانیش خۆی پێنەدەگیرا و توانای قسەكردنی نەبوو، ئەفسەرەكە دڵنیای كردەوە كە ئەو وەكو برایەكی وایە و ئەم یەكەم كەس نییە كە كێشەی هەبووە، رۆژانە كێشەی لەو جۆرە و هی تریشیان دێتە پێش، ئەم قسانەی ئەفسەرەكە (شەیما)یان هێور كردەوە و ئەمجارە لەجیاتی گریان و هەنسكدان، رق و كینە لە دەروونیدا گڵپەی سەند و ئیتر دەستی بە گێڕانەوەی ناوەڕۆكی گرفتەكەی كرد و داوای وەرگرتنی رێوشوێنی تووندی لە دژی دەكرد. (شەیما) دەستی بە گێڕانەوەی بەسەرهاتەكەی كرد و گوتی: من كوڕێكم بەناوی (عەلی) خۆشدەویست، ئەویش وای نیشان دەدا كە منی خۆشدەوێت و تەنانەت رۆژێ دە جاران خۆی بە قوربانم دەكرد و دەستی ماچ دەكردم، زۆر بە فروفێڵ و نەرم و نیانی لێم هاتە پێشەوە، تەنانەت هەموو شتێكی دەكرد تەنیا بۆ ئەوەی دڵم بكەوێتە سەری، ئیتر منیش كەوتمە داوی و گیرۆدەی بووم، چەندین جار بەیەكەوە و بەتەنیا پیاسەمان دەكرد، پەیوەندییەكەمان دوو ساڵی خایاندووە.
لە ساڵی یەكەمدا تەنیا لەناو كۆلیژدا پیاسەمان دەكرد، بەڵام لە ساڵی دووەم لەناو شار و لە بازاڕ و هەندێ جاریش لە باغی گشتی شارو یەك دوو جاریش دەیبردمەوە شوقەكەی خۆی كە بە تەنیا لێی دەژیا و بەكرێی گرتبوو، چونكە لە خێزانێكی دەوڵەمەند بوو، بۆیە نەچوو بووە بەشی ناوخۆیی. دواجار دوو رۆژ پێش ئێستا ئێوارەیەكیان گوتی ئەم ئێوارەیە لە چێشتخانە خواردن دەكڕم و لە شوقەكەی خۆم پێكەوە نانی ئێوارە دەخۆین، منیش رازی بووم، كە ئێوارە چووینەوە لەسەر رێگا خواردنە سەفەرییەكەی كڕی و بردمانەوە شوقە و نانی ئێوارەمان لەوێ خوارد، تا درەنگانی شەو مامەوە، ئیتر لێم هاتە پێشەوە و دەستی كرد بە ماچ كردنم. نێو كاتژمێرێك خەریكی یەكتر بووین، هەر هێندە بە ئاگا هاتمەوە دیتم كچ نەماوم، دەستم بە گریان و لەخۆدان كرد، بەڵام ئەو هەر زوو هێمنی كردمەوە گوتی: بۆ وا دەكەی ئەگەر حەز دەكەی بەیانی لەگەڵم وەرە شاری خۆمان و دەتبەمە لای دایك و باوكم و تۆیان پێدەناسێنم و دەڵێم دەمەوێ داخوازی ئەم كچەم بۆ بكەن، هەموو شتێكیان بۆ باس دەكەم تەنیا ئەم مەسەلەیە نەبێ، پێیان دەڵێم كە ئێمە یەكتریمان خۆشدەوێ. ئیتر منیش هێمن بوومەوە و تا رادەیەك ترسەكەم رەوییەوە، بەڵام زۆر بە قوڵی نیگەران بووم، كە هاتمەوە بە (نادیە)م گوت شتێكی وەهام بەسەرهاتووە، گوتی هەتا زووە با بەگەرمی چارەسەری بكەین ئەگینا خۆی دەرباز دەكات. ئیتر ئەوەبوو بەیانی كە چوومە كۆلێژ پرسیارم كرد گوتیان نەهاتووە. چاوەڕێم كرد تا تەواو بوونی دەوامی كۆلیژ، لە یەكێ لە برادەرەكانیم پرسی گوتم: كوا (عەلی) گوتی نازانم ئەمڕۆ نەهاتووە، بۆیە لەبەر ئەوە من داوام لە دژی هەیە چونكە دەستدرێژی لێكردووم و نامووسی بردووم.
هەڵاتنی كەتنكەر
ئەفسەرەكە كە بە جوانی گوێی لە بەسەرهاتەكەی (شەیما) گرت زانی كەسێك بۆ مەرامێكی خۆی زاڵمانە لە خشتەی بردووە، بۆیە زوو بە زوو دۆسییەی بۆ كردەوە و هەموو شتەكانی ئامادە كرد، وتەكانی (شەیما) ی نووسیەوە و گەیاندیە لای دادوەر، ئەویش فەرمانی دەركرد كە بە زووترین كات (عەلی) دەستگیر بكرێ و لێكۆڵینەوەی لەگەڵدا بكرێ، هەر ئەو رۆژە ئەفسەرەكە فەرمانی دەستگیركردنی ئامادە كرد و چوون لە رێگەی راگرایەتی كۆلیژ هەوڵیاندا دەستگیری بكەین، بەو مەرجەی كەس بە گرتنەكە و هۆی گرتنەكە و كێشەكەی (شەیما) نەزانێ).
ئەوەبوو بەخۆی و چەند پۆلیسێكەوە لە رێگەی پرسگە و ئیدارەی كولیژەوە گوایە لە بەشێكی سەر بە زانكۆ كاریان پێیە نەخشەیان دانا بۆ دەستگیركردنی، پاش هەوڵ و كۆششێكی زۆر دەركەوت كە (عەلی) بەیانی زوو ئەم شارەی بەجێهێشتووە و كەسیش نەیزانیوە بۆ كوێ رۆیشتووە، بۆیە بەدەست بەتاڵی گەڕانەوە بنكە، لەوێ كە (نادیە و شەیما) هەر لە چاوەڕوانی دابوون و پێشبینیان دەكرد لەگەڵ خۆیانی بهێنن كە ئەفسەرەكە مەسەلەكەی پێگوتن، (شەیما) یەكسەر لە هۆش خۆی چوو، دوای بە خۆهاتنەوەی بەنائومێدی و تێكشكاوی، دوای كاتژمێرێك گریان و هەنسك دان، بنكەی پۆلیسی بەجێهێشت، بەو ئومێدەی بەیانی دەستگیری بكەن، بەڵام نەك بەیانی بەڵكو هەفتەیەكیشی پێچوو كەچی كابرای كەتنكەر هەر ئاسەواریشی نەبوو. دوای ئەو هەفتەیە (شەیما)ش كۆلیژی بەجێهێشت، نە (عەلی)یش جارێكی تر نەهاتەوە ئەم كۆلیژە.