گوڵان-كوردۆ شابان


هاولاَتیان گله‌ییه‌كی زۆریان له‌و غه‌رامانه‌ هه‌یه‌ كه‌ له‌ رِێگای كامێراكانی به‌رِێوه‌به‌رایه‌تی پۆلیسی هاتوچۆی هه‌ولێره‌وه‌ تۆمار دەركێت و پێیان وایە نرخەكان لەگەڵ بژێوی ژیانی خەڵك یەكناگرێتەوە.


بەڕێوەبەرایەتی هاوتوچۆی هەولێر، لە خزمەتگوزارییەكی نوێیاندا بۆ كارئاسانتر كردنی شۆفێران، ئێستا لەرێی ماڵپەڕەكەیانەوە www.hawlertp.com هاوڵاتیان دەتوانن نرخ و رێژەی ئەو سەرپێچییانەی كردوویانە بزانن، ئەمەش بەكردنەوەی بەشی (رووداوەكان) لەناو ماڵپەڕەكەدا.

له‌مباره‌یه‌وه‌ ژماره‌یه‌ك له‌ هاولاَتیان پێیان وایه‌ ئه‌و بڕە زۆره‌و حسابی رێژه‌ی به‌رده‌وامی خێرایی ئۆتۆمبێلی تێدا نییه‌ كه‌ زۆربه‌ی شه‌قامه‌كانی ناوشار قه‌ڵه‌باڵخه‌و ئۆتۆمبێل ناتوانێت به‌ خێراییه‌كی ئاسایی و مۆڵه‌تپێدراو تێپه‌رِ بێت، كاتێكیش ده‌گاته‌ شوێنێكی چۆڵ راسته‌وخۆ پۆلیسی هاتوچۆ له‌ كه‌میندان و غه‌رامه‌یه‌ له‌سه‌ر هاولاَتیان داده‌نێن، لەكاتێكدا بڕی غەرامەكان بۆ هەر سەرپێچییەك، بەراورد بەبژێوی ژیانی تاكی ناوەند لە وڵاتدا زۆرە.

شوفێرێك رایگەیاند: به‌هۆی زۆری شه‌قامه‌كان و جیاوازی پانتایی و جۆری شه‌قامه‌كه‌ به‌زه‌حمه‌ت شوفێر ده‌توانێت هه‌موو جارێك له‌ رِێگای هێماكانه‌وه‌ بزانێت له‌سه‌ر چه‌ند خێرایی برِوات. شۆفێرێكی تر دەڵێ: زۆرجار له‌ وه‌سڵه‌كان هه‌ڵه‌ی تێدایه‌ بۆنموونه‌ ئۆتۆمبێل هه‌یه‌ مۆدێلی 2008 كه‌چی وه‌سڵی غه‌رامه‌ی به‌به‌رواری 2007 بۆ هاتۆته‌وه‌، هه‌ر بۆیه‌ پێویسته‌ پۆلیسی هاتوچۆ چاوێك به‌و غه‌رامانه‌ بخشێنێته‌وه‌و بۆ ساڵی 2011 ئه‌و مه‌بله‌غانه‌ بكاته‌ نیوه‌ی تاوه‌كو هاولاَتیان سه‌ردانی به‌رِێوه‌به‌رایه‌تی هاتوچۆ بكه‌ن بۆ پێدانی غه‌رامه‌كانیان هاوكات وه‌كو ده‌ستخۆشیه‌كیشی لێدێت بۆ به‌رِێوه‌به‌رایه‌تی ناوبراو تاوه‌كوه‌ له‌2012 شوفێل زیاتر پابه‌ندی لێخورِین بێت .