17ی کانوونی یەکەم/دیسەمبەر(گوڵان میدیا)- به‌پێی‌ راپرسییه‌ك كه‌ به‌م دواییه‌ له‌نێو قوتابیانی‌ زانكۆكانی‌ عێراقدا ئه‌نجامدراوه‌ 87%ی‌ به‌شداربوان له‌ ره‌وشی‌ ئێستا نیگه‌رانن، هاوكات هه‌ستی‌ تایفی‌ لای‌ گه‌نجان به‌شێوه‌یه‌كی‌ به‌رچاو كه‌می‌ كردووه‌.

ناوه‌ندی‌ زانیاری‌ توێژینه‌وه‌‌و په‌ره‌پێدان رۆژی‌، شه‌ممه‌، دانیشتنێكی‌ له‌ هۆڵی‌، ئه‌نجومه‌نی‌ عێراقی‌ بۆ ئاشتی‌‌و پێكه‌وه‌ژیان، سازدا بۆ خستنه‌رووی‌ راپرسی‌ \"به‌شداری‌ سیاسیانه‌ی‌ لاوان\" كه‌ ناوه‌نده‌كه‌ به‌هاوكاری‌ دامه‌زراوه‌ی‌، فریدریش ئیبه‌رت،ی‌ ئه‌ڵمانی‌ سازیداوه‌‌و 2148 قوتابی‌ زانكۆی‌ له‌ هه‌ردوو ره‌گه‌ز له‌ پارێزگاكانی‌، به‌غداد، هه‌ولێر، سه‌لاحه‌دین، ئه‌نبار، نه‌جه‌ف، زیقار‌و به‌سره گرتوه‌ته‌وه‌‌.

به‌پێی‌ راپرسیه‌كه‌، 62.6% ی‌ به‌شداربووان رایان وایه‌ كه‌ به‌شداری‌ گه‌نجان له‌ دامه‌زراوه‌ فێركارییه‌كاندا فراوانه‌، له‌كاتێكدا 35.8% رایان وایه‌ كه‌ به‌شداری‌ گه‌نجان كه‌مه‌ یان بونی‌ نییه‌. و 46.9% ده‌ڵێن به‌شداری‌ لاوان له‌ رێكخراوه‌كانی‌ كۆمه‌ڵگای‌ مه‌ده‌نی‌‌و چالاكیه‌كانیدا كه‌مه‌ یان هه‌ر نییه‌، له‌به‌رامبه‌ریشدا 45.5% باوه‌ریان وایه‌ كه‌ به‌شداری‌ لاوان به‌ئاستی‌ به‌رفراوان یان ناونده‌.


راپرسیه‌كه ده‌ریده‌خات،‌ 50.6% ی‌ گه‌نجان به‌شداری‌ ناكه‌ن یان به‌شێوه‌یه‌كی‌ كه‌م به‌شداری‌ له‌ پارته‌ سیاسیه‌كاندا ده‌كه‌ن و 38.4% ده‌ڵێن گه‌نجان به‌شێوه‌یه‌كی‌ به‌رفراوان یان ناوه‌ند به‌شدارن.

سه‌ره‌رای‌ ئه‌وه‌ی‌ 48.7%ی‌ قوتابیان باوه‌ریان وایه‌ كه‌ گه‌نجان به‌شداری‌ ناكه‌ن یان به‌شێوه‌یه‌كی‌ كه‌م به‌شداری‌ له‌ چالاكی‌ مه‌ده‌نی‌‌و خۆبه‌خشانه‌ ده‌كه‌ن و 39.6% یان پێیان وایه‌ گه‌نجان به‌شێوه‌یه‌كی‌ به‌رفراوان یان ناوه‌ند له‌و چالاكیانه‌ به‌شدارن.

راپرسیه‌كه‌ چه‌ندین بواری‌ تری‌ له‌خۆگرتوه‌ له‌وانه‌، 50.3%ی‌ به‌شداربووان باوه‌ریان وایه‌ گه‌نجان به‌شداری‌ كۆمه‌ڵه‌ تایفی‌‌و چه‌كدارییه‌كان ناكه‌ن‌و 30.1% ده‌ڵێن به‌شێوه‌یه‌كی‌ فراوان به‌شداری‌ ده‌كه‌ن.

له‌ گرنگرتین ئه‌و ده‌رئه‌نجامانه‌ش كه‌ راپرسییه‌كه‌ پێی‌ گه‌یشتووه‌، 87% ی‌ به‌شداربوان هه‌ست به‌بێئومێدی‌‌و نیگه‌رانی‌ ده‌كه‌ن له‌ ره‌وشی‌ ئێستا، ئه‌مه‌ش به‌هۆی‌ كه‌ڵه‌كه‌بوونی‌ گرفته‌ سیاسی‌‌و ئابووری‌‌و كۆمه‌ڵایه‌تی‌‌و رۆشنبیرییه‌كانه‌وه‌یه‌.

33.2% ی‌ به‌شداربوان پێناسی‌ تایفیی‌ لای‌ ئه‌وان له‌ پله‌ی‌ پێنجه‌مدایه‌، له‌به‌رامبه‌ردا 8.2% پێناسی‌ تایفی‌ له‌لایه‌ن له‌ پله‌ی‌ یه‌كه‌مدایه‌، ئه‌مه‌ش نیشانه‌ی‌ ئه‌وه‌یه‌ كه‌ هه‌ستی‌ تایفی‌ لای‌ گه‌نجان به‌شێوه‌یه‌كی‌ به‌رچاو كه‌می‌ كردووه‌. هه‌روه‌ك 39.7% ده‌ڵێن ناسنامه‌ی‌ نیشتیمانی‌ له‌ پله‌ی‌ یه‌كه‌مدایه‌و ته‌نها 3.0% پێناسی‌ نیشتیمانی‌-یان له‌پله‌ی‌ پێنجه‌مدا دیاری‌ كردووه‌.