16ی کانوونی یەکەم/دیسەمبەر(گوڵان میدیا)- له‌چوارچێوه‌ی سیاسه‌تی كرانه‌وه‌ی سه‌رۆكایه‌تی په‌رله‌مان به‌رووی چین و توێژه‌كانی كۆمه‌ڵگه‌ی كوردستان به‌تایبه‌تی له‌رووی ده‌ركردنی یاساو برِیاره‌كان كه‌ پێش ئه‌وه‌ی بخرێته‌ به‌رنامه‌ی كار له‌گه‌ڵ ئه‌و گروپانه‌ گفتوگۆی له‌سه‌ر بكرێت كه‌ په‌یوه‌ندیان به‌یاساكه‌وه‌ هه‌یه‌. له‌م چوارچیوه‌یه‌دا دوێنێ د.ئه‌رسه‌لان بایز سه‌رۆكی په‌رله‌مانی كوردستان كۆبوونه‌وه‌یه‌ك له‌گه‌ڵ یه‌كێتی ژووره‌ بازرگانیه‌كانی هه‌رێمی كوردستان و یه‌كێتی وه‌به‌رهێنه‌ران و ژماره‌یه‌ك له‌وه‌به‌رهێن و بازرگانانی هه‌رێم له‌ ته‌ڵاری په‌رله‌مانی كوردستان به‌رێوه‌چوو.

له‌و كۆبوونه‌وه‌یه‌دا كه‌ بۆ وه‌رگرتنی سه‌رنج و تێبینیه‌كانی وه‌به‌رهێن و بازرگانانی هه‌رێم بوو و سه‌باره‌ت به‌هه‌ردوو پرۆژه‌ یاسای كانزایی و و ناكانزایی له‌هه‌رێمی كوردستان كه‌ له‌لایه‌ن حكومه‌تی هه‌رێم پێشكه‌شی په‌رله‌مان كراوه‌و به‌ئاماده‌بوونی هه‌ردوو لیژنه‌ی پێشه‌سازی و ووزه‌و یاسایی و نوێنه‌ری حكومه‌تی هه‌رێم به‌رێوه‌چوو، سه‌رۆكی په‌رله‌مان ئاماژه‌ی به‌وه‌دا كه‌ سیاسه‌تی سه‌رۆكایه‌تی په‌رله‌مانه‌ كه‌ پرۆژه‌كان پێش ئه‌وه‌ی ببنه‌ یاسا له‌گه‌ڵ لایه‌نی په‌یوه‌ندیدار به‌یاسه‌كه‌ گفتوگۆی له‌باره‌وه‌ بكرێت و بۆ ئه‌مه‌ش یاسای توندوتیژی خێزانی و یاسای رۆژنامه‌نووسان و پرۆژه‌ یاسای زانیاری به‌نمونه‌ هێنایه‌وه‌.

سه‌رۆكی په‌رله‌مان گوتیشی: ئه‌م كۆبوونه‌وه‌یه‌ بۆ ئه‌وه‌یه‌ گوێتان لێبگرین و ره‌چاوی بیرورِاو تێبینیه‌كانتان بكه‌ین له‌كاتی دارشتنه‌وه‌و گفتوگۆكردنی هه‌ردوو پرۆژه‌ یاساكه‌، هه‌موو ئه‌مانه‌ش له‌پێناوی ده‌ركردنی یاسایه‌كه‌ كه‌ له‌كۆتاییدا زۆرترین سوودی بۆ هاووڵاتیانی هه‌رێمی كوردستان و كه‌مترین درزی هه‌بێت له‌كاتی جێبه‌جێكردندا.

پاشان دارا جه‌لیل خه‌یات سه‌رۆكی یه‌كێتی ژووره‌ بازرگانی و پیشه‌سازیه‌كانی هه‌رێم به‌ناوی ژووره‌كه‌یان و بازرگانان و وه‌به‌رهێنانی سوپاسی سه‌رۆكایه‌تی و په‌رله‌مانی كوردستانی كرد بۆ ئه‌م كۆبوونه‌وه‌یه‌و گوتی: ئه‌مه‌ یه‌كه‌م ده‌رفه‌ته‌ كه‌ بازرگانان له‌گه‌ڵ په‌رله‌مان كۆ ده‌بنه‌وه‌ ئه‌وه‌شی به‌سه‌ره‌تایه‌كی باشزانی و بۆئه‌وه‌ی یاساكان به‌پرس و راوێژ ده‌ربچن به‌تایبه‌تی ئه‌وانه‌ی په‌یوه‌ندیان به‌ بواری بازرگانی پیشه‌سازیه‌وه‌ هه‌یه‌. سه‌باره‌ت به‌ هه‌ردوو پرۆژه‌ یاسای كانزایی و و ناكانزایی رایگه‌یاند : به‌نوسراوێكی ره‌سمی سه‌رجه‌م تێبینیه‌كانیان ده‌خه‌نه‌ به‌رده‌ست په‌رله‌مانی كوردستان. دواتر هه‌ریه‌ك له‌ ئه‌حمه‌د رێكانی سه‌رۆكی یه‌كێتی وه‌به‌رهێنه‌رانی كوردستان و سه‌رۆكی ژووره‌ بازرگانیه‌كانی هه‌رێم و بازرگان و وه‌به‌رهێنانی ئاماده‌بوو سه‌رنج و تێبینیه‌كانی خۆیان له‌باره‌ی هه‌ردوو پرۆژه‌ یاساكه‌ خسته‌روو.