گەورەترین خیانەت كە ئێستا لە مێژووی كورددا دەكرێت ئامانجی ئەوەیە، لە سوریا كۆتایی بە دۆزی كورد بهێنێت و بە تەواوی لەناوی ببات، لەسایەی ئەو بێدەنگییە نەتەوەییە گومانلێكراوەدا، شاندی كورد لە دەوحە ئەگەر ئازایەتی و پابەندبوونی سیاسیی هەبووایە،یان غیرەتێكی راستەقینەی هەبووایە دەربارەی ئاییندەی دۆزی گەلەكەی، ئەگەر بەم شێوە شەرمەزاری و گاڵتەپێكردنەوە ئامادەی كۆنگرەكان نەبووایە، دەبوو زۆر ئازایانەو بە ئاشكرا لە كۆنگرەكە كشابایەوە وەك ناڕەزاییەك بەرامبەر بێدەنگیی ئۆپۆزسیۆنی سوریا لە هەمبەر ئەوەی كە لە سەری كانیێ و شوێنەكانی دیكەدا ڕوودەدات.
حزبی(ب ی د) و هێزەكانی بەرگری میللی زیاتر لە لایەنی دیكە داوایان لێدەكرێت و بەرپرسن كە روونكردنەوەیەك بدەن لەسەر هەڵكوتانە سەر سەری كانیێ لەلایەن سوپای ئازادەوە، چونكە وا بە ئاسانی پشتمان نەبەستووەو پشتیش نابەستین بە هیچ ڕۆڵێكی(خوا لێی خۆشبێت) ئەنجومەنی كوردی،ئەوەی ئێستا لە ناوچە كوردییەكان، لە شارو شارۆچكەو گوندەكان، هەر یەكێك بێت، چەك هەڵدەگرێت، پێویستە لەسەری بە تایبەتی لە ئێستادا پارێزگارییان لێبكات دژی هەموو هێڕشێكی ناحەز و دوژمنانی دۆزی كورد بە هەموو توانایەكیانەوەو بێ دوودڵی،جا لەهەر لایەكەوە بێن،ئەگەر ئەمە نەكات ئەوا پێویستە چەك دابنێت،لە جیاتی چەك كەمانچەیەك بخاتە ژێر باڵیەوەو بە گوندە وێرانەكانی كورددا بسووڕێتەوەو سروودی بەزینیان بۆ بچڕێت.
هەر لە كۆنەوە ناپلیۆن بۆناپارت گوتوویەتی: (دەتوانین هەموو شتێك بە سەرەڕم بكەین بەڵام ناتوانین لەسەری دابنیشین) سەبارەت بە كوردیش ئەم كارەو ئەركی سەرەڕم لەم قۆناغە هەستیارەی مێژوودا جیاوازە،چونكە ئەگەر لە پێناو بەرگری كردن لە چارەنووس و ئاییندە بەكارنەیەت،ئەوا هیچ لەبەردەم هەڵگرەكەی نامێنێتەوە مەگەر بە زۆری لەسەری دابنیشێت.
ئەو گەلەی هەر ڕۆژێك شەڕێك نەكات لە پێناو ئازادی،ئەوا هەرگیز شایەنی ئازادی نییە، بەڵكو شایەنی كۆیلایەتی هەمیشەییە، هەروەها ئەو گەلەی هەر ڕۆژێك شەڕێك نەكات لە پێناوبوونی خۆی و خاكەكەیدا مافی ئەوەی نییە بڵێت ئەمە خاكەكەی منە،گەلانێكی زۆر لە خاكەكەی خۆیان ڕیشەكێشكران و خاكەكەیان داگیركراو درا بە خەڵكانی دیكە هەر لەبەر ئەوەی لەگەڵ داگیركەران لە ژێر بڕوبیانووی زۆرەوە سازشیان كردووە، لەوە مەترسیدارتر ئەوەیە كە (سەری كانیێ) ببێتە سەرەتای داڕمانی تەواوی دۆزی كورد لە سوریاو هێرشی بەكۆمەڵی (بیاباننشینە ڕەگەزپەرستەكان)و سەلەفییەكان بۆ سەر (سەری كانیێ) سەرەتای گەورەترین شكستی نەتەوەیی لە مێژووی هاوچەرخی كورددا تۆماربكرێت، ئەوەی لە ئەشرەفیەو قەستەڵ ڕوویاندا تاقیكردنەوەیەكی كەڕامەتی كوردایەتی بوو بۆ هەمووان كە زۆریان تێیدا دەرنەچوون و زۆر لە كەرامەتی خۆمانمان لەدەست دا،ئەمڕۆش ئەوەندەی لە كەرامەتمان ماوەتەوە لە سەری كانیێ وا خەریكە بە خۆڕایی لەبەرامبەر كوشتاری كەسانی دیكە دەیدۆڕێنین،لە ئێستاشدا دوای ئەو رووداوانە ئەوەی تا ئێستا پەندی وەرنەگرت و تێنەگەیشت، ئەوا هەرگیز دركی پێناكات،ئەوانەی تەقەیان لە خۆپیشاندەرانی سڤیل كرد لە گەڕەكی ئەشرەفیەی حەلەب ئەوانە بكوژو تیرۆریست بوون، هیچ جیاوازییان لەگەڵ رژێمی ستەمكاردا نییە، ئەوانەشی كە پاكانەیان بۆ ئەو تاوانبارانە هێنایەوە بێگومان بەشدارییان لە تاوانەكەدا كردووە،هەروەها ئەو حزب و گرووپە كوردییانەو ئەو دەستە سیاسییانەی بەرامبەر ئەم تاوانە بێدەنگ بوون ئەوا خیانەتیان لەگەڵ خوێنی قوربانییەكانی كورددا كردووە، لە هەمان كاتیشدا بەو بێدەنگییە پڕ لە شەرمەزارییە رێگایان بۆ ژێر پێی داگیركەرانی سەری كانیێ خۆشكرد،هێزە سیاسییەكانی كوردی و گرووپەكان دەستەوەستانن، ئەم قسەیە ئەوانە دەگرێتەوە كە لەهەمبەر ئەو تیرۆرو تۆقاندنەی گەلەكەمان لەحەلەب و قەستەڵ جندۆ دووچاری بوونەتەوە،بێدەنگی دەنوێنن. ئەو داگیركەرانەی كە شورەی شارەكانمانیان بەزاندو بەنێو گوندو ئاواییەكاندا وەربوون و گیانی هاووڵاتیانیان كردە سووتماك،ئەم هەموو ڕووداوە ویژدانی لایەنە كوردییەكانی نەهەژاند، ئەم بێدەنگییە لە پای چی؟دوای ئەوەی تیرۆریستان و كەتیبەكانی نەتەوەپەرست و سەلەفییەكان ئەم تاوانانەیان ئەنجامدا بە هاوكاریی و هەلهەلەی چەند لایەنێكی كوردی،كە لایان ئاسایی بوو پێشوازی لە هێرش و ئاڵای داگیركەران (بەعسییەكانی دوێنێ و تێكۆشەرانی ئەمڕۆ) بكەن،بۆیە ئەوانە پاساوی بێدەنگیی حزبیی خۆیان بە بیانووی سیاسی پڕوپووچ دەهێننەوە و بەدوای رێگەچارەی غەیرە نەتەوەیی كەوتوون و دەیانەوێت سەرنجی ڕای گشتی بەرەو كێشەی قەڵپ پەلكێش بكەن و تێڕوانینی خەڵكەكە لە ئاست كێشە ڕاستەقینییەكان و تەحەددییە چارەنووسسازەكان بە لاڕێدا ببەن، تاكو داگیركەران لە دەرفەتێكدا هێرشمان بكەنەسەر و شارو شارۆچكەكانمان داگیر بكەن و كەسێك نەبێت بەریان پێ بگرێت.
مەبەستی سەرەكی لە پشت ستراتیژییەكانی خافڵاندنی سیاسی لە شەقامی كوردیدا ئەوەبوو كاردانەوەیەكی لاسەنگ لای خەڵك دروست بكەن و پاڵیان بنێن تا بە مەرام و پلانە گڵاوەكانیان قایل بن،كە ئەوان هەرگیز پەسندی ناكەن بەبێ سەپاندنی ئەو بارودۆخە یان مەرجە سیاسی و كۆمەڵایەتییە دروستكراوەكان، بۆیە هێزە سیاسییەكانی كورد توانیان سەركەون و لەم ڕووەوە شەقامی كوردیان قایل كرد پێشوازی لەم گرووپەچەكدارانە بكەن، لە كاتێكدا كە هەر ئەوانەن بە نێو گوندەكانی كورد وەردەبن و هاووڵاتیانی سڤیلی كورد دەڕفێنن.
شەڕی چارەنووس لێرەدایەو لێرەوەش دەست پێدەكات،لە سەری كانیێ كە بەتەنیا بەرگری لەخۆی دەكات دژی پەلاماری سەرسەخترین دوژمن بە ئاییندەی كورد، ئا لێرەدایە تاقیكردنەوەی مەزنی شەرعییەتی مافە مێژوویی و نەتەوەییەكانمان، لێرەدا شایەنیی مێژووییمان بە ئازادی و یەكسانی دەردەكەوێت وەكو گەل و دۆز، ویژدانی هاوبەشیی نەتەوەیی شەقامی كوردی كەمتەرخەم نەبووە هەتا وەفاداربێت بەرامبەر ئەو ئامۆژگارییەی كە كاتی بەسەرچووە كە دەڵێت (دەبێت سیاسەت بۆ سیاسەتكاران جێبێڵین)، خاوەنانی ئەو ئامۆژگارییە یەكەم كەس بوون لە یەكەمین ڕووبەڕووبوونەوەی چارەنووسسازی گەلەكەمان لە (سەری كانیێ)و شوێنی دیكە بەزین و هەڵاتن،بەڵێ ماوەیەكی كورت نەبوو كە شەقامی گشتی لە هەستی رەخنەگرانەی خۆی لە سیاسەت و رەفتارەكان دابڕان، هاوشانی ئەمەش متمانەیەكی زۆری بە خودی خۆی لەدەست دا،ئەویش بە هۆی گاڵتەكردن بە داخوازی و مەیلەكانی و ڕاهێنانیان لەسەر بەزۆر پەسندكردنی رێگەچارەی سیاسی، بەڵام لەبەرامبەر ئەمەشدا توانیویەتی لەئێستادا هۆش بێنێتەوە بەرخۆی و رێگەچارەكان هەڵبژێرێت.
دیارە ئازادییەكی راستەقینە بۆ گەلەكەمان وەدینایەت و لە سوریای ئاییندەشدا یەكسانی پێنابڕێت ئەگەر بێتو بەڕاشكاوی داننەنێین بە هەڵە سیاسییەكانمان،لە هەمان كاتیشدا دەبێت ئیرادەمان لەئاست بەرژەوەندییە نەتەوەییەكانمان یەكبخەین،چونكە وەك دەبینین سیاسەتمەداری بچووك و هەلپەرستان ویست و ئیرادەی میللەتیان زەوتكردووەو چارەنووسی پێشێل دەكەن،ئەوانە تەنیا سەركەوتنی خۆیان مەبەست بووە و تا ئێستاش باجەكە زۆر گران لەسەر گەلەكەمان وەستاوە،ئەوەی جێگەی نائومێدییە بۆ هەمووان ئەوەیە كە گشت شۆڕشی گەلان كەڵەپیاوی بەرزی مێژووییان بەرهەمهێناوە، جەوهەری ئەم كارە لەوەدایە كە پیاوانی سیاسەت لە سوریا ڕانەهاتوون لەسەر گێڕانی هیچ ڕۆڵێكی باڵای مێژوویی، ئەوان پێویستیان بە بڕوابەخۆبوون هەیە تا ئەو ڕۆڵە بگێڕن، بۆیە زۆر جار دەبینین كە بەوە قایل دەبن ڕۆڵێكی پەراوێزخراوی لاوەكی بگێڕن ئەو ڕۆڵەی كە هەروەكو دەڵێن لەپیاوان بوەشێتەوە،هەندێ جاریش دەبینین بێ شەرمانە لەسەر مێزی ئۆپۆزسیۆنی سوریا كۆ دەبنەوە، گەلان زۆرجار بە ئاسانی فێڵیان لێدەكرێت، گەلەكەشمان لەم قۆناغەدا زیاتر لە قۆناغەكانی دیكە لەلایەن سیاسییەكانیانەوە فێڵیان لێكرا بەڵام ترسەكە لەوەدایە كە فێڵ لێكردنی ئەم جارە خۆكوشتنێكی مێژوویی بێت.