دوای بەهارەكەی میسڕ و دەستپێكردنی ململانێی هەڵبژاردنەكان، ئیخوان وەك هەر لایەنێكی دی ئەو وڵاتە خۆی ئامادە كرد بۆ دانانی كەسێك بۆ پۆستی سەرۆكی وڵات، رەنگە لەسەرەتاوە بڕوای بەوە بووبێت كە دەتوانێ لە هەڵبژاردنەكان سەردەكەوێ. ئەگەرچی لەسەرەتاوە بە ویستی ئەوان نەبوو، چونكە (خيرت شاتر) پاڵێوراوی سەرەكی حیزبەكە بەهۆی كێشەی یاساییەوە قبووڵ نەكرا، بەڵام كۆتاییەكەی وەك دەیانویست هاتە دی، دكتۆر محەمەد مورسی بە دەنگی زۆرینەی میسریەكان بووە یەكەم سەرۆكی دوای شۆڕشەكە.
مورسی لەسەرەتای وەرگرتنی پۆستەكەی لە وتارێكدا 100 رۆژی بۆ میسڕیەكان دانا كە تێیدا دەتوانێ گۆڕانكاری و چاكسازی لە گرفتە هەرە مەزنەكانی گەلی میسڕ پێوەی دەناڵێنێ، چارە بكات. هەڵبەت ئەوە تێگەشتنی میسریەكان و هەموو چاودێرێك بوو لە جیهان بۆ بەرنامە سەد رۆژیەكەی سەرۆكی میسڕ، بەڵام دوای تێپەڕبوونی ئەو ماوەیە، دەبینین میسڕیەكان دەڵێن ئەوی دكتۆر باسی كرد كوا!.
ماڵپەڕی (مورسی میتر) كە تایبەتە بە وردبینی كردن و چاودێری بەرنامەی كارەكانی سەرۆك، راپرسیەكی كردوە و تێیدا زۆرینەی خەڵك رازی نین لە جێبەجێكردنی مورسی بۆ بەرنامەكەی، بەپێی راپۆرتی ماڵپەڕەكەش تەنها 9%ی بەرنامەكە جێبەجێ كراوە.
لە شەریعەتی ئیسلامدا، چور مانگ و 10 رۆژ، ئەو ماوەیەیە كە ئافرەت دەتوانێ دوای مێردە كۆنەكەی، مێردێكی دی بكاتەوە. برایانی موسڵمان لە میسڕ بەپێی پابەندیان بە ئایین و تێگەشتنی خۆیان بۆ ئەو حوكمە، هەمان یاسایان بۆ میسڕ داناوە، وڵاتی دایكی شارستانیەتیەكان لە زمانی عەرەبی (مێ)یە، سەرۆكیش نێرە، بەو پێیەی ئێستا بێوەژنە و پێشتر چەند شوویەكی دی كردوە، پێویست بە وەلی ئەمر ناكات بۆ مارەكردنەوەی، خۆی راستەوخۆ مێردی بە كوڕێكی خانەوادەی ئیخوان كرد كە بەڕێز دكتۆر مورسیە.
لە وتاری دوای 100 رۆژەكەی مورسی، لەجیاتی ئەوەی داوای لێبوردن لە خەڵكی بكات كە نەیتوانی بەرنامەكەی جێبەجێ بكات كە سێ خاڵی زۆر سەرەكی بوو (ئاساییش، تەندروستی، نان) وەك پیاو سالارێك و بە نەڕەی بەرز گوتی، بەڵێ بەرنامەكە بەسەركەوتوویی جێبەجێ كراوە، لەهەندێكی 70% و هەندێكی دیش 80%ی تەواو بووە. لەڕاستیدا زانیم ئیدی میسڕی لێ مارە كرا، ئاخر ئەوان شۆڕشەكە بە هی خۆیان دەزانن، لە ماوەی كۆتایی شۆڕشەكە و ئەو 100 رۆژەی داینابوو، ماوەیەكی دروستە بۆ مارەكردنەوەی خاتونە میسڕ، چونكە چوار مانگ و 10 رۆژەكەی بەسەردا تێپەڕی. ئیدی ئەوە ماوە بڵێین خوا بكات خاتوون لەم مێردە تازەیەی بحەسێتەوەو بەدەست دش و خەسووی خانەوادەی ئیخوان گیر نەخوات.